الاهلي يكسب بأي مدرب

الاهلي يقدر يكسب بأي حد جملة اتكررت على مدار اكثر من 20 سنة خصوصا مع تولي الاسطورة مانويل جوزيه مسئولية تدريب الاهلي مطلع عام 2004. الجملة دي اثبتت فشلها قبل واثناء وبعد تولي جوزيه المسئولية ,اللي كان كتير من الكارهين للاهلي بيحاولوا دايما يقللو من مجهود الراجل مع الجيل اللي هو خلاه جيل ذهبي , ماحدش يقدر ينكر انه كان معاه لاعيبة مميزة ,لكن مين اللي رجع بركات من لاعب كان بيمر بأسوأ مواسمه مع العربي القطري؟ الاجابة جوزيه , مين اللي صبر على عماد متعب بعد الاصابة وبعد فترة عدم انضباط من اللاعب وخلاه يطلع افضل ماعنده؟ الاجابة جوزيه . مين اللي رغم خلافه الكبير مع عصام الحضري ماحولش المسألة لخلاف شخصي وكان بيخليه اساسي وعرف يخلق ليه دوافع انه يكون احسن حارس في افريقيا ؟ الاجابة جوزيه . والامثلة كتير مش هيكفي المقال ده لذكرها.

جوزيه اعتزل ولسا ناس بتكرر نفس الجملة. على قد حزن الواحد على اللي بيمر بيه الاهلي بعد رحيل كولر على قد مالحياة بتنصف الراجل ده هو وغيره من المدربين اللي الناس دايما كانت بتنكر مجهودها , كل يوم نسمع عن حد بيقول انا لو ادرب الاهلي هكسب كل حاجه. طب انت احسن من موسيماني اللي كسب 3 افريقيا مع الاهلي وصن داونز وماقدرش يكسب الدوي؟
طب انت احسن من بونفرير صاحب ذهبية اتلانتا 1996 ؟ طب انت احسن من اوليفيرا اللي سيرته الذاتية كانت تفوق جوزيه ؟ طب كلمني عن سواريش ؟ او ديكسي ؟ او توروب ؟

كفاية اجحاف لمجهود المدربين , اكيد الاهلي فريق كبير والمفترض انه يكون دايما عنده افضل اللاعيبه , لكن برضو لازم يكون عنده افضل مدرب وافضل اختيار للمدرب في افضل وقت.